Raporo ngarukamwaka ya Rwanda Statistical Yearbook yasohowe n’Ikigo cy’Igihugu cy’Ibarurishamibare (NISR) mu mpera za Ukuboza 2025 igaragaza ko ishoramari rikomeje kwiyongera mu Rwanda, rikagira uruhare runini mu guhanga imirimo mishya.
Iyo raporo, ishingiye ku makuru yatanzwe n’Urwego rw’Igihugu rw’Iterambere (RDB), igaragaza ko mu 2024 ishoramari ryageze ku gaciro ka miliyari 3,27 z’Amadolari ya Amerika, rivuye kuri miliyari 1,67$ ryariho mu 2017. Iri zamuka ryagize uruhare mu guhanga imirimo mishya irenga 51.000 muri uwo mwaka.
Mu myaka umunani ishize, ishoramari n’imirimo byagiye byiyongera nubwo hari ibihe byagizweho ingaruka n’icyorezo cya Covid-19 by’umwihariko mu 2020. Icyakora, mu 2021 ishoramari ryageze ku rwego rwo hejuru rwa miliyari 3,75$, ari na bwo imirimo mishya yongereye kuzamuka.
NISR igaragaza ko nubwo agaciro k’ishoramari gashobora kugabanuka cyangwa kwiyongera bitewe n’umwaka, gakomeje kuba inkingi ya mwamba mu guhanga imirimo mishya, rifasha Abanyarwanda kubona akazi.
Mu rwego rwo gukomeza uru rugendo, Guverinoma y’u Rwanda, binyuze muri Gahunda ya Kabiri y’Igihugu yo Kwihutisha Iterambere (NST2) ya 2024–2029, yihaye intego yo guhanga nibura imirimo ibihumbi 250 buri mwaka, ku buryo mu myaka itanu hazaba hahanzwe imirimo mishya irenga miliyoni imwe n’ibihumbi 250
