Mu Rwanda,Ubushakashatsi bwakorewe ku bagabo batandukanye mu byiciro by’imyaka n’imibanire bugaragaza ko hari igice gikomeje kugaragaza imyitwarire y’imibonano mpuzabitsina ishobora guteza ibyago by’ubuzima, nubwo hari intambwe igaragara mu ikoreshwa ry’agakingirizo.
Mu bantu 1,019 babajijwe, 24,5% bemeye ko baryamanye n’abatari abagore babo cyangwa abo batabana mu mezi 12 ashize, aho 73,8% bakoresheje agakingirizo mu gikorwa giheruka. Abagabo bafite hagati y’imyaka 25–29, 8,6% baryamanye n’abantu barenze babiri muri uwo mwaka, ariko 30% gusa ni bo bakoresheje agakingirizo mu gikorwa giheruka.
Mu bafite imyaka 30–39, 8,7% baryamanye n’abantu barenze babiri mu mwaka ushize, naho 22% gusa bakoresha agakingirizo. Mu kigero cy’imyaka 40–49, 7% baryamanye n’abantu barenze babiri, ariko ikoreshwa ry’agakingirizo riri hasi cyane, aho 8,9% gusa ari bo barikoresheje mu gikorwa giheruka.
Ku bagabo batashatse, 4,7% baryamanye n’abantu barenze umwe mu mwaka ushize, ariko 69% bakoresheje agakingirizo. Mu bashakanye babana, 7,4% baryamanye n’abandi bagore, gusa 4,9% ni bo bakoresheje agakingirizo. Abahawe gatanya bagaragaje umubare munini w’abaryamanye n’abantu barenze babiri (14,5%), aho 64,5% bakoresheje agakingirizo mu gikorwa giheruka.
Iyi mibare igaragaza ko nubwo hari aho ikoreshwa ry’agakingirizo riri hejuru, hakiri icyuho kinini cyane cyane mu bashakanye n’abageze mu myaka y’ubukure, bikagaragaza ko hakenewe ubukangurambaga bwimbitse ku buzima bw’imyororokere n’uruhare rw’agakingirizo mu kwirinda indwara zandurira mu mibonano mpuzabitsina.
