Noeline Narubega uzwi nka Isimbi Noeline, wamamaye mu Rwanda mu bihe bitandukanye birimo n’ibijyanye n’amafoto n’amashusho yagiye avugwaho cyane ku mbuga nkoranyambaga, yatangaje ko yigeze kugwa mu mutego w’ibyo yise ubucuruzi bw’abantu bwitwikira amasezerano y’urukundo n’ishyingirwa.
Mu buhamya bwe, yavuze ko yajyanywe mu mahanga ku nyungu z’undi muntu nyuma yo kwemera ibyo yari yabwiwe ko ari gahunda yo kubaka urugo, nyamara ngo byari uburyo bwo kumukuramo inyungu. Yavuze ko atari we wenyine wagizweho ingaruka, ahubwo ko hari n’abandi bakobwa nibura bane banyuze muri uwo mutego umwe.
Noeline ashinja umugabo ukomoka muri Repubulika Iharanira Demokarasi ya Congo, ufite ubwenegihugu bwa Finlande, kuba ari we wari inyuma y’iyo gahunda. Yavuze ko uwo mugabo yageze muri Finlande anyuze mu Rwanda nk’impunzi mbere yo gutangira ibikorwa amushinja.
Uyu mugore yavuze ko uburyo bwakoreshwaga bwashingiraga ku masezerano yo gushyingirwa cyangwa urukundo rw’inyungu, bigakoreshwa nk’inzira yorohereza kujyana abakobwa mu mahanga. Yemeza ko bamwe mu bagiye bemera ayo masezerano batari bazi ko bashobora kwisanga mu bikorwa bifitanye isano n’ubucuruzi bw’abantu.
Kugeza ubu, uwo mugabo ashinjwa ibyo bikorwa ntabwo aragira icyo abitangazaho mu ruhame, ndetse n’inzego zishinzwe iperereza ku byaha mu Rwanda ntiziratangaza niba hari iperereza ryatangiye cyangwa ibindi bisobanuro kuri ayo makuru.
Ubucuruzi bw’abantu bukomeje kuba kimwe mu byaha bihangayikishije ibihugu byinshi, aho abategetsi n’imiryango mpuzamahanga bagaragaza ko akenshi abakobwa n’abagore ari bo bibasirwa cyane n’abakoresha amayeri arimo amasezerano y’akazi, urukundo cyangwa gushyingirwa kugira ngo babone uko babajyana mu bindi bihugu.
Icyakora, ku birego bya Noeline, haracyategerejwe icyo inzego zibishinzwe zizabivugaho ndetse n’uruhande rushinjwa rugatanga ibisobanuro ku byo rushyirwa mu majwi.
