Umukinnyi ukiri muto wa Arsenal, Max Dowman, yanditse amateka mashya muri Premier League nyuma yo kuba umukinnyi muto kurusha abandi bose wegukanye igikombe cya shampiyona y’u Bwongereza afite imyaka 16 gusa.
Ku munsi wa nyuma wa shampiyona, Dowman azaba afite imyaka 16 n’iminsi 144, ibintu byatumye aca agahigo kari gafitwe na Phil Foden wa Manchester City. Uyu musore wa Arsenal yemerewe guhabwa umudali w’icyubahiro uhabwa abakinnyi begukanye Premier League kuko yakinnye imikino irenga itanu isabwa kugira ngo umukinnyi yemererwe uwo mudali.
Dowman yari asanzwe yaranakoze amateka ubwo yabaga umukinnyi muto utsinze igitego muri Premier League, nyuma yo gutsinda igitego cyiza yafashije Arsenal gutsinda Everton ibitego 2-0 muri Mutarama 2026, afite imyaka 16 n’iminsi 73.
Mu bakinnyi bakiri bato begukanye Premier League harimo kandi Phil Foden wabikoze afite imyaka 17 n’iminsi 350 mu mwaka wa 2017/18 ari muri Manchester City. Foden yafashije iyi kipe kugera ku manota 100, ibintu byari amateka muri icyo gihe.
Undi ni Rico Lewis wegukanye igikombe afite imyaka 18 n’iminsi 188 muri sezon ya 2022/23. Uyu mukinnyi yigaragaje cyane kubera ubushobozi bwo gukina hagati no mu bwugarizi.
Hari kandi Brahim Diaz wabaye umukinnyi wa mbere ukomoka muri Maroc wegukanye Premier League ubwo yari afite imyaka 18 n’iminsi 283.
Gael Clichy nawe yanditse amateka muri Arsenal ubwo yatwaraga igikombe cya shampiyona mu mwaka wa 2003/04 afite imyaka 18 n’iminsi 294, muri saison yiswe iy’“Invincibles” aho Arsenal itigeze itsindwa umukino n’umwe.
Rafael da Silva yatwaye Premier League afite imyaka 18 n’iminsi 319 muri sezon ya 2008/09 ari muri Manchester United.
Mu bandi bakinnyi bakiri bato begukanye iri rushanwa harimo Nicolas Anelka, Neco Williams, Phil Neville, Ryan Giggs na Curtis Jones.
Ibi byose bigaragaza uburyo amakipe akomeye yo mu Bwongereza agenda yizera impano z’abakiri bato, bamwe muri bo bakaba banandika amateka akomeye bakiri bato cyane.
