Perezida wa Uganda, Yoweri Kaguta Museveni, yongeye gutsinda amatora y’Umukuru w’Igihugu yabaye ku wa 15 Mutarama 2026, atsinda ku majwi 71,6%, ahigitse abandi bakandida barindwi bari bahatanye.
Komisiyo ya Uganda ishinzwe amatora yatangaje ko umukandida wamukurikiye ari Robert Kyagulanyi Ssentamu uzwi nka Bobi Wine wagize amajwi 24,72%, mu gihe James Nandala Mafabi wo mu ishyaka FDC yagize 1,88%. Abandi bakandida bagize amajwi ari munsi ya 1%.
Aya matora yitabiriwe n’abaturage 52,5% mu bagera kuri miliyoni 21,6 bari ku rutonde rw’abatoye.
Muri rusange habaruwe amajwi arenga miliyoni 11, aho Museveni yagize hafi miliyoni 8, Bobi Wine agira arenga miliyoni 2,7.
Bobi Wine yatangaje ko atemera ibyavuye mu matora, avuga ko habayemo uburiganya no guhagarika internet, anavuga ko we n’umugore we bari mu bwihisho nyuma yo kugabwaho igitero n’abashinzwe umutekano.
Yasabye Abanya-Uganda kwanga ibyatangajwe na Komisiyo y’amatora.
Mu gihe hatangazwaga ibyavuye mu matora, habaye imvururu mu bice bitandukanye by’igihugu zirimo no mu mujyi wa Kampala. Polisi yatangaje ko abantu 12 bapfiriye muri izo mvururu, abandi barakomereka, mu gihe umutekano wakajijwe mu duce twagaragayemo akavuyo.
