Ruzindaza Doxa Benaiah ni umunyabugeni mbonerajisho w’umunyarwanda wihariye mu gukora portraits akoresheje ibikoresho bitandukanye birimo amabuye, plasta, colle, ibiti n’amarangi kuri canvas.
Mu bihangano bye, ntabwo agarukira ku gushushanya isura gusa, ahubwo anashyiramo ubutumwa n’ibisobanuro byihariye kuri buri kintu aba yakoresheje.
Mu mwaka wa 2024, Ruzindaza yakoze portraits ebyiri zifite ubutumwa bwihariye: imwe igaragaza abahanzi babanyempano Vestina na Dorcas, indi ikagaragaza Apostle Mignonne Kabera.
Portrait ya Vestina na Dorcas: Igihangano cy’ubumwe n’imbaraga
Ruzindaza Doxa Benaiah asobanura ko igitekerezo cyo gukora portrait ya Vestina na Dorcas cyaje mu mwaka wa 2024, ashingiye ku rukundo n’ishimwe afite ku bihangano by’aba bakobwa.
Avuga ko yakunze umuziki wabo, ubwiza bwabo ndetse n’ubuzima bwabo bw’umwuka, abona ko ari abantu urubyiruko rushobora kwigiraho byinshi.
Ati: “Bafite umuziki mwiza, ni beza, kandi rwose barakijijwe bya nyabyo. Umunyabwenge yabigiraho byinshi.”
Iki gihangano gifite ubunini bwa 120 cm × 100 cm, kikaba cyarakozwe hifashishijwe ibikoresho bitandukanye birimo umugozi w’inyabubiri, amabuye, plasta, colle n’amarangi kuri canvas.
Umugozi w’inyabubiri: Ikimenyetso cy’ubumwe
Ku bwa Ruzindaza, umugozi w’inyabubiri uri muri iki gihangano ugereranya ubumwe bwa Vestina na Dorcas.
Avuga ko aba bakobwa bameze nk’agati gakubiranyije, kagaragaza uburyo bafatanye kandi baromatanye. Ni ikimenyetso cy’uko ubufatanye bwabo ari bwo shingiro ry’itsinda ryabo.
Amabuye: Imbaraga no kudacika intege
Amabuye na yo afite ubutumwa bwihariye. Ruzindaza ayagereranya n’imbaraga n’ubudaheranwa bwa Vestina na Dorcas.
Kuri we, aba ni abakobwa b’abanyembaraga, bashobora kuba urugero rwiza ku rubyiruko kubera ko “ntibatsindwa, ntibacika intege kandi barinzwe n’ingabo zo mu ijuru.”
Bityo, portrait yabo ntiyerekana isura yabo gusa, ahubwo inagaragaza uko umuhanzi ababona: abantu bahujwe, bafite imbaraga kandi bafite ubutumwa bwo gutera abandi imbaraga.
Portrait ya kabiri ni iya Apostle Mignonne Kabera: Igihangano cy’urukundo, kwizera n’ubutumwa bw’umusaraba
Indi portrait yakozwe na Ruzindaza Doxa Benaiah ni iya Apostle Mignonne, yakozwe na bwo mu mwaka wa 2024.
Ruzindaza avuga ko yayikoze ashingiye ku rukundo n’icyubahiro afitiye Apostle Mignonne, avuga ko yamugiriye uruhare rukomeye mu buzima bwe.
Ati: “Yaransannye, yaranyubatse, yampaye ubuzima!”
Ibyo ni byo byatumye ahitamo kumukorera igihangano cyihariye, akoresheje ibikoresho bitandukanye birimo amabuye 12 manini n’andi mato, wall master, plasta, ibiti bikoze umusaraba, ibara rya zahabu, ibara ritukura n’amarangi kuri canvas.
Amabuye 12 manini: Government y’Imana
Amabuye 12 manini ari muri iki gihangano afite igisobanuro cyihariye. Ruzindaza avuga ko ahagarariye government y’Imana muri Women Foundation Ministries ndetse na Noble Church.
Ni uburyo umuhanzi yahisemo gukoresha mu kugaragaza imiterere y’ubuyobozi n’ishingiro ry’umwuka abona muri ibyo bigo by’amadini.
Umusaraba wa zahabu: Gucungurwa no gukurikira Yesu
Ibiti bikozwe mu ishusho y’umusaraba kandi biri mu ibara rya zahabu, bigaragaza ubutumwa bw’ingenzi bw’iki gihangano.
Ruzindaza avuga ko umusaraba usobanura ko Apostle Mignonne akijijwe neza kandi ko yageze ku musaraba, aho awufata nk’ikimenyetso cyo gucungurwa kwa muntu.
Anongeraho ko umusaraba usobanura ko Apostle Mignonne yikoreye umusaraba we agakurikira Yesu, ashingiye ku myemerere ye ya gikristo.
Ibiti biri munsi y’umusaraba: Gutumbira ku byiringiro
Ibiti biri munsi y’umusaraba na byo bifite ubutumwa.
Ku bwa Ruzindaza, bisobanuye ko abantu bakwiriye gutumbira ku musaraba, kuko ari ho abona hari ibyiringiro bitakoza isoni.
Ni igitekerezo cyibutsa umuntu kudacika intege, ahubwo agakomeza kureba ku cyo kwizera kwe kumwereka nk’isoko y’ibyiringiro.
Ibara rya zahabu: Ubutunzi bw’ubumana
Ibara rya zahabu ryakoreshejwe muri portrait rifite igisobanuro cy’umwuka.
Ruzindaza avuga ko risobanuye ko Apostle Mignonne afite ubutunzi bwinshi bw’ubumana muri we. Zahabu aha iba ikimenyetso cy’agaciro n’ubutunzi bwo mu rwego rw’umwuka umuhanzi amubonamo.
Ibara ritukura: Imbaraga z’amaraso ya Yesu
Ibara ritukura na ryo rifite ubutumwa bukomeye mu gihangano.
Ruzindaza avuga ko risobanuye ko Apostle Mignonne atwikiriwe mu maraso ya Yesu, kandi ko ahagarara mu mbaraga z’ayo maraso kugira ngo akore ibikomeye.
Ubuhanzi bufite ubutumwa burenze isura
Mu bihangano bya Ruzindaza Doxa Benaiah, portrait ntabwo ari ishusho y’umuntu gusa. Ni uburyo bwo kuvuga inkuru binyuze mu bikoresho, amabara n’ibimenyetso.
Mu portrait ya Vestina na Dorcas, yibanze ku bumwe, imbaraga no kudacika intege. Mu ya Apostle Mignonne, yibanda ku rukundo, kwizera, umusaraba, ibyiringiro n’imbaraga z’umwuka.
Ibi bigaragaza uburyo Ruzindaza akoresha ubuhanzi nk’ururimi rutuma ibyo yemera, ibyo yishimira n’ubutumwa ashaka kugeza ku bandi biboneka mu ishusho.
Ruzindaza yifuza ko iki gihangano yazagishyikiriza banyiracyo kuko yakibakoreye murukundo no mubuhanga bwe bwubugeni mbonerajisho.
