Ikipe ya Rayon Sports igiye gucakirana na APR FC mu mukino wa Super Cup 2025, igikombe gifatwa nk’ikiruta ibindi mu mupira w’amaguru mu Rwanda. Uyu mukino uzaba ari inshuro ya gatanu aya makipe yombi agiye guhura muri iri rushanwa.
Super Cup ku rwego mpuzamahanga
Igikombe cya Super Cup ntigikinirwa mu Rwanda gusa, ahubwo no mu bindi bihugu kirahakinirwa, nubwo gikorwa mu buryo butandukanye bitewe n’igihugu.
Muri Tanzania, Super Cup yitwa “Ngao ya Jamii”, aho hafatwa amakipe ane yabaye aya mbere, agahurizwa mu mikino ya kamarampaka, atsinda akajya ku mukino wa nyuma.
Mu Bwongereza, igihugu gifatwa nk’icyitegererezo mu mupira w’amaguru, hakinwa “Community Shield”, ihuza ikipe yatwaye shampiyona n’iyegukanye igikombe cya FA Cup.
Muri Espagne ho, Super Cup ihuza amakipe abiri ya mbere muri shampiyona n’andi abiri yageze ku mukino wa nyuma w’Igikombe cy’Umwami (Copa del Rey). Mu myaka ya vuba, iri rushanwa rikinirwa muri Arabia Saudite.
Super Cup mu Rwanda
Mu Rwanda, Super Cup ihuza ikipe yatwaye igikombe cya shampiyona n’iyegukanye igikombe cy’Amahoro. Iri rushanwa ryatangiye gukinwa mu 2002, icyo gihe ryegukanwa na APR FC itsinze Rayon Sports ibitego 2-1. Ryongeye kugaruka mu 2013, ryegukanwa na AS Kigali itsinze Rayon Sports igitego 1-0.
Mu 2014 na 2015 ntabwo super cup yakinwe, ariko mu 2016 yagarutse yegukanwa na APR FC itsinze Rayon Sports ibitego 3-0.
Mu 2017, Rayon Sports yahise yihorera kuri APR FC iyitsinda ibitego 2-0 mu mukino wabaye amateka. Uyu mukino watangiriye kuri Stade ya Rubavu, uhagarikwa ku munota wa 63 kubera ikibazo cy’umuriro, ukomerezwa bucyeye kuri Stade ya Kigali i Nyamirambo (ubu ni Kigali Pelé Stadium).
Icyo gihe Rayon Sports yari yatsindiwe ibitego byinjijwe na Diarra na Pierrot, umukino urangira nta kindi gitego cyongeyemo.
Kuri Super Cup ya 2018, APR FC yari yegukanye igikombe cya shampiyona ihura na Mukura VS yari yatwaye igikombe cy’Amahoro.
Mu 2019, Rayon Sports yegukanye Super Cup itsinze AS Kigali kuri penaliti 3-1, nyuma y’uko iminota 90 yari yarangiye ari ibitego 2-2.
Mu 2020 na 2021, iri rushanwa ntiryakinwe. Ryagarutse mu 2022, ryegukanwa na AS Kigali itsinze APR FC kuri penaliti 5-4 nyuma y’aho umukino wari warangiye ari 0-0.
Kuri Super Cup ya 2023, Rayon Sports yongeye kwegukana igikombe itsinze APR FC ibitego 3-0 byatsinzwe na Charles Bbale, Kalisa Rachid na Joakim Ojera.
Super Cup iheruka ya 2024 yo yegukanwe na Police FC, itsinze APR FC kuri penaliti 6-5.
Super Cup 2025
Super Cup ya 2025 igiye guhuza APR FC, yegukanye igikombe cya shampiyona n’icy’Amahoro cya 2025, na Rayon Sports yabaye iya kabiri muri shampiyona ikanatsindirwa ku mukino wa nyuma w’igikombe cy’Amahoro.
Muri rusange, aya makipe yombi agiye guhura ku nshuro ya gatanu muri Super Cup, aho Rayon Sports yatsinze inshuro ebyiri, APR FC nayo ikayitsinda izindi ebyiri, bigaragaza ko ari umukino utegerejwe cyane n’abakunzi b’umupira w’amaguru mu Rwanda.
